Rýhanı kelisim kúnine oraı oblys ortalyǵy – О́skemende «Rýhanı mýzyka jáne poezııa keshi» ótti. Shara aıasynda Dostyq úıi – qoǵamdyq kelisim ortalyǵynda kórme ashylyp, qundy jádigerler kelýshi jurttyń nazaryna usynyldy. Jádigerler ishinde 1637 jyly Máskeý baspa saraıynda basylǵan dinı kitaptar, Quran-Kárimniń birneshe tilge aýdarylǵan nusqalary, 1830-shy jyldardyń basynda baı kópester saldyrǵan О́skemendegi alǵashqy musylman meshiti, qazirgi Jastar saıabaǵy aýmaǵynda turǵan Pokrov ǵıbadathanasynyń maketteri bar.
Kórmeni jurtshylyqpen birge oblys ákiminiń orynbasary Ásem Núsipova da tamashalap, Dostyq úıinde ótken rýhanı keshke qatysyp, oblys turǵyndaryn Rýhanı kelisim kúnimen quttyqtap, óńirde ultaralyq tatýlyqty, konfessııaaralyq kelisim men turaqtylyqty nyǵaıtýǵa eleýli úles qosyp júrgen bir top memlekettik qyzmetshiler men dinı birlestikter jetekshilerin marapattady. «Bul merekeniń kópultty jáne kópkonfessııaly elimizdiń órkendep, damýynda alatyn máni men mańyzy erekshe. Sondyqtan da Elbasymyz 1992 jyldyń 18 qazanynda Rýhanı kelisim kúnin bekitti. Onyń nátıjesin ózderińiz búgin kórip otyrsyzdar. Bizdiń oblysta da túrli ulttar men ulystar dini men senimine qaramastan tatý-tátti ómir súrip keledi. Osyndaı tamasha kúni barsha shyǵysqazaqstandyqtardyń otbasyna baqyt, tatýlyq pen kelisim tileımin» dedi oblys ákiminiń orynbasary.
О́SKEMEN
